ಪರಸತಿಮೋಹ

ತಾಳ: ಮಿಶ್ರಛಾಪು                               ರಾಗ: ದೇಶೀ

ಎಲ್ಲಿ ಕಲಿತೆಯೋ ಇಂಥಾ ಜಾಲೆಗಳನು ಆ

ಲಲ್ಲೆಗಾರತಿಯ ಕೂಡಾಡಿ ಬಂತದಕೇನು                                   || ಪ ||

ಅವಳ ಕುರುಳಿವಳ ಮುಗುಳ್ನಗೆಯನೆ ಬಯಸುವುದು

ಇವಳ ನಯನಗಳವಳ ಮುದ್ದು ಮೊಗವಾ

ಅವಳಕ್ಷಿ ಇವಳ ತೊಳ್ಗಳನೆಂದು ನಿನ್ನ ಸಖಿ

ವಿವರಿಸಿ ಬರೆದುದ ನೀನೋಡಿದುದ ಸಖಿ ಪೇಳ್ದ                          || 1 ||

ತರುಣಿ ಹಾರವನು ಮತ್ತೋರ್ವಳುಂಗುರವನು

ಸರ್ವಾಭರಣವ ಧರಿಸಿದಳೋರ್ವಳು

ಭರದಿ ಮೂವರೊಳಗಾರನು ಕಳುಹಲೆಂದು ಸಖಿ

ಬರೆಯಲದ ನೀನೋಡಿಕೊಂಡುದನೆ ಸಖಿ ಪೇಳ್ದ                        || 2 ||

ಇನ್ನಾದರೆಯು ಪರಸತಿಯರ ಬೇಟವ ಬಿಟ್ಟು

ನಿನ್ನ ನಂಬಿದಳೆಂದು ಮನಕೆ ತಂದು

ಎನ್ನ ಕರದೊಳಗೆ ಕರವಿಟ್ಟು ಮನ್ನಿಸೋ ಕೆಳದಿ

ಪನ್ನಗಾಭರಣ ಶ್ರೀ ರಾಮೇಶಲಿಂಗ                                         || 3 ||

ಬಾಲೆಯರ ಆಶೀರ್ವಾದದ ಹಾಡು

ತಾಳ: ಮಿಶ್ರಛಾಪು                                      ರಾಗ: ತೋಡಿ

ಶ್ರೀ ಗಣಪತಿಯ ಪಾದಾಬ್ಜಕೆ ನಮಿಸಿ

ರಾಗದಿಂದಲಿ ಶಾರದೆಯ ಸ್ಮರಿಸಿ

ನಾಗಭೂಷಣನ ಪದಾಬ್ಜಯುಗಳಕೆ ತಲೆ

ವಾಗಿ ಬಾಲೆಯರಾಶೀರ್ವಾದದ ಪದಗಳ

ರಾಗದಿ ಪಾಡಿ ಪೊಗಳುವೆ                                                           || 1 ||

ಸಾಲಿ ಸೀರೆಯನುಟ್ಟು ಸರಮುತ್ತಕಟ್ಟು

ಬಾಲಕಿಯರೊಳು ಕಟ್ಟಾಣಿ ನೀನಾಗು

ಮೇಲೆನಿಪಷ್ಟಪುತ್ರರನು ಪಡೆದು ಸುಖಿ

ಬಾಳು ಸ್ತ್ರೀಯರಿಗೆಲ್ಲಾ ದೊರೆಯಾಗು

ಶ್ರೀ ಮೈಲಾರಲಿಂಗನ ಕೃಪೆಯಿಂದಾ                                             || 2 ||

ಪಲ್ಲಕ್ಕಿಯ ಸಾನಂದದೊಳೇರು

ಹಲ್ಲಣಿಸಿದ ಕರಿತುರಗವನೇರು

ಎಲ್ಲಾಭರಣವನಿಟ್ಟು ಸುಖದಿಪ್ರಾಣ

ದೊಲ್ಲಭಸಹಿತ ಸಂತೋಷದೊಳಿರು ಶ್ರೀ

ಕೊಲ್ಲೂರ ಮೂಕಾಂಬೆಯ ಕೃಪೆಯಿಂದಾ                                        || 3 ||

ಚಂದ್ರಕಸ್ತುರಿಯ ತಿಲಕಗಳನಿಟ್ಟು

ಚಂದದಿ ಕುಂಕುಮ ರೇಖೆಯನಿಟ್ಟು

ಇಂದೀವರನೇತ್ರಕೆ ಕಪ್ಪಿಟ್ಟು ಅ

ಚಂದ್ರಾರ್ಕವು ಸುಖಬಾಳು ಶೃಂಗೇರಿಯ

ಚಂದ್ರಮೌಳೀಶನ ಕೃಪೆಯಿಂದಾ                                                   || 4 ||

ಅರಿಶಿನ ಚೂರ್ಣವನನುಲೇಪಿಸುತ

ಪರಿಮಳಗಂಧವ ಪಸರಿಸಿಕೊಳುತ

ಕರಿಯಮಣಿಯ ಮುತ್ತಿನಸರಗಳನಿಟ್ಟು

ಪರಮಸಂತೋಷದೊಳಿರು ಶ್ರೀ ಹಂಪೆಯ

ವಿರೂಪಾಕ್ಷನ ಕೃಪೆಯಿಂದಾ                                                         || 5 ||

ಪರಿಮಳಿಸುವ ಪುಷ್ಪಸರಗಳ ಮುಡಿದು

ಗುರಿಹಿರಿಯರ ಆಶೀರ್ವಾದವ ಪಡೆದು

ಹರುಷದಿ ಪುತ್ರಪೌತ್ರರ ಸಲಹುತ ಪತಿ

ಚರಣಸೇವೆಯ ಮಾಡಿ ಸುಖಮಿರು ಕುಕ್ಕೆಯ

ವರ ಸುಬ್ರಹ್ಮಣ್ಯನ ಕೃಪೆಯಿಂದಾ                                                 || 6 ||

ಸರಸ್ವತಿಯಂತೆ ವಿದ್ಯಾವಂತೆಯಾಗು

ಸಿರಿಯಂತೆ ಸೌಭಾಗ್ಯವಂತೆ ನೀನಾಗು

ಅರುಂಧತಿಯಂತೆ ಪತಿವ್ರತೆಯಾಗುತ

ಪರಮಾನಂದಗೊಳಿರು ಶ್ರೀ ಕೆಳದಿಯ

ಪುರದ ರಾಮೇಶನ ಕೃಪೆಯಿಂದಾ                                                  || 7 ||

ವಿಘ್ನೇಶ್ವರ ಪ್ರಾರ್ಥನೆ

ಆವ ಕಾರ್ಯಕೂ ಮುಂಚಿನ ಪೂಜೆ ನಿಮ್ಮ

ತಾಯಿ ತಂದೆಯು ಕಲಿಸಿದ ವೋಜೆ                                             || ಪ ||

ಜಾತಕರ್ಮಕೆ ನಾಮಕರಣಕೆ ಚೌಲಕೆ

ಸಾತಿಶಯಾಕ್ಷರ ಪ್ರಾರಂಭಕೆ

ನೂತನ ವಿದ್ಯಾರಂಭಕೆ ಮುಂಜಿಗೆ

ಯಾತಕೂ ಶ್ರೀ ಗಣಪತಿ ಜಯ ಜಯವೆಂದೂ                                 || 1 ||

ಮದುವೆಗೆ ಋತುಶಾಂತಿಗೆ ಸೀಮಂತಕೆ

ಮುದದಿಂದ ಜನನವ ಬರೆವುದಕೆ

ಸದಮಲ ಯಜ್ಞಾರಂಭಕೆ ಸಮರಕೆ

ಮೊದಲೇ ಶ್ರೀ ವಿಘ್ನೇಶ್ವರ ಜಯ ಜಯವೆಂದೂ                                || 2 ||

ದಾನಕೆ ಧರ್ಮಕೆ ಪರ ಉಪಕಾರಕೆ

ಜ್ಞಾನಮಾರ್ಗಕೆ ಗಾನಕೆ ಗೀತೆಗೆ

ನಾನಾವಿಧ ಸುವ್ರತ ತೀರ್ಥಯಾತ್ರೆಗೆ

ನೀನೆ ಗತಿ ಗಣಪತಿ ಜಯ ಜಯವೆಂದೂ                                        || 3 ||

ಕೆರೆ ಕಾಲುವೆ ಕೂಪಗಳ ವಿಸ್ತಾರಕೆ

ಸುರಗೃಹ ರಥ ಉತ್ಸವ ಪೂಜೆಗೆ

ಸರಸ ಸರೋವರಗಳ ನಿರ್ಮಾಣಕೆ

ಸಿರಿ ಗಣಪತಿ ಪಾವನಮೂರ್ತಿ ಜಯವೆಂದೂ                                 || 4 ||

ಹರ ನಿಮ್ಮ ಪೂಜಿಸಿ ಪುರಮೂರ ಜಯಿಸಿದ

ಗರುಡಗೆ ಅಮೃತವು ಸಿದ್ದಿಸಿತು

ವರರಾಮಚಂದ್ರ ನಿಮ್ಮಡಿಯ ಪೂಜಿಸಿ ದಶ

ಶಿರನ ಗೆಲಿದನೆನೆ ಗಣಪತಿ ಜಯವೆಂದೂ                                      || 5 ||

ದ್ವಾಪರಯುಗದಲಿ ಧರ್ಮರಾಯನು ನಿಮ್ಮ

ನೇ ಪೂಜಿಸಿ ಕೌರವರ ಗೆಲಿದಾ

ಭೂಪರ ಜೈಸಿ ತುರಗವ ತಂದ ಸಾಂಬನು

ಶ್ರೀಪತಿನುತ ಗಣಪತಿ ಜಯ ಜಯವೆಂದೂ                                    || 6 ||

ವರದಾನದಿಯ ತೀರವಾಸ ಶ್ರೀ ಕೆಳದಿಯ

ಪುರವರಾಧೀಶ ರಾಮೇಶ್ವರನ

ಪರಮಮೋಹದ ಪುತ್ರ ಪಾವನತರಗಾತ್ರ

ವರದ ಶ್ರೀ ಗಣಪತಿ ಜಯ ಜಯ ಜಯವೆಂದೂ                               || 7 ||

 [ನಾಟರಾಗದಲ್ಲಿ ನುಡಿಸಬಹುದಾಗಿದೆ: ಆದಿತಾಳ]

ಬಾಲಕರ ಆಶೀರ್ವಾದದ ಪದ

ರಾಗ || ನೀಲಾಂಬರಿ

ಅನ್ನದಾನವನ್ನೆ ಮಾಡು ಕನ್ಯದಾನವನ್ನೆ ಮಾಡು

ನಿನ್ನ ನಂಬಿದರ ಪೊರೆದುನ್ನತ ಹರ್ಷದಿ ಬಾಳು

ಸನ್ನುತ ಸರ್ವಲೋಕಗಳನ್ನು ರಕ್ಷಿಸುವನಾಗು ಪ್ರ-

ಸನ್ನ ಮೂರುತಿಯಾಗು

ರನ್ನದ ರಾಶಿಗಳನ್ನು ಚಿನ್ನದ ಆಭರಣಗಳನ್ನು

ಭೂಸುರರಿಗಿತ್ತು ಮನ್ನಿಸು ಉದಾರನಾಗು

ಮನ್ನೆಯರೆಲ್ಲರು ಬಂದು

ನಿನ್ನನೋಲೈಸಲೆಂದು ಅಪರ್ಣೆ ಪರಸಿದಳು                                   || 1 ||

ಕೋಟಿ ಗೋದಾನವ ಮಾಡು ಸಾಟಿಯಿಲ್ಲದಂಥಾ ಪಂಚ

ಕೋಟಿ ಗಜದಾನ ಶಟಕೋಟಿಯಶ್ವದಾನಗಳ

ಮೀಟಾದ ಬ್ರಾಹ್ಮರಿಗಿತ್ತು ಕೀರ್ತಿವಂತನಾಗು ಕಿ-

ರೀಟಿ ಶೌರ್ಯದೊಳಾಗು ಮೀಟಾದ ಮಂತ್ರಿಗಳ ಕಿ-

ರೀಟ ರತ್ನಕಾಂತಿಗಳ ಕೋಟಿ ನಿನ್ನ ಪಾದದಲ್ಲಿ

ಧಾಟಿಯಾಗಿರುವನಾಗು

ಲೂಟಿಸಿ ವೈರಿಗಳನು ಗೋಟುಗೊಳಿಸುವ ಶಶಿ

ಜೂಟ ಭಕ್ತನಾಗು                                                                     || 2 ||

ಇತ್ತೆರದೆ ಬೀಸುತಿಹ ಮುತ್ತಿನ ಚಾಮರ ಶ್ವೇತ

ಛ್ಛತ್ರ ಸೀಗುರಿಗಳ ಮೊತ್ತದ ಸಾಲೊಳಗೆ ಒ-

ಪ್ಪುತ್ತಲಿರುವವನಾಗು ಸತ್ಯವಂತನಾಗು ಸುವ್ರತ ನೀನಾಗು

ಪೆತ್ತವರು ನೋಡಿ ನಲಿವುತ್ತಿರಲು ಭೂಸುರರು

ಮುತ್ತಿನಕ್ಷತೆಯನಾಂತು

ಪೃಥ್ವಿಯ ವೊಳಗೆ ಲ್ಲ್ಲಾ ಸ-

ರ್ವೋತ್ತಮ ಪುರುಷನಾಗೆನುತ್ತ

ಮಸ್ತಕದಿ ತಳುವುತ್ತ ಪರಸಿದರು                                                  || 3 ||

ಇಂದ್ರನಾಗು ಭೋಗದೊಳು ಸತ್ಯವಾಕ್ಯದೊಳು ಹರಿ-

ಶ್ಚಂದ್ರನಾಗು ಪಾಲನೆಯ ಮಾಡುವುದರೊಳಗೆ ಉ-

ಪೇಂದ್ರನಾಗು ಬುದ್ಧಿ ಕೌಶಲದೊಳು ತಿಳಿಯಲು ನಾ-

ಗೇಂದ್ರ ನೀನಾಗು

ಚಂದ್ರನಾಗು ಶಾಂತಿಯೊಳಗೆಂದು ವಂದಿಮಾಗಧರ

ವೃಂದ ಕರವೆತ್ತಿ ಜಯವೆಂದು ಪೊಗಳುತ್ತಿರಲಾ-

ಚಂದ್ರಾರ್ಕವು ಸೌಖ್ಯದಿ ಬಾಳೆಂದು ಸಾನಂದದೊಳಾಗ

ಇಂದಿರೆ ಪರಸಿದಳು                                                                 || 4 ||

ಧೀರನಾಗುದಾರನಾಗು ಸೂರಿಜನವಾರಕೆ ಮಂ-

ದಾರನಾಗು ಸಂಗರ ಶೂರನಾಗು ವೈರಿ ಜ-

ಝ್ಝೂರನಾಗು ಮಣಿಮಯ ಹಾರನಾಗು

ವೀರಾಧಿವೀರ ನೀನಾಗು

ಭೂರಮಣನಾಗು ಮಂತ್ರಿವಾರ ಸಂರಕ್ಷಕನಾಗು

ಕಾರುಣ್ಯಸಾಗರನಾಗು ಕಾಮಿತಫಲಿದನಾಗು

ಶ್ರೀ ರಾಮೇಶನ ಪಾದಾಬ್ಜ ವಾರಿಜ ಭಕ್ತನಾಗೆಂದು

ಶಾರದೆ ಪರಸಿದಳು                                                                  || 5 ||