ಏನ ಬೇಡಲಿ ನಿನ್ನ....?

ರಾಗ: ಕಾಂಬೋಜಿ     :     ಝಂಪೆ ತಾಳ


ನಿನ್ನ ಸೇವೆಯನೊಂದನಿತ್ತು ಸಲಹೋ
ಎನ್ನ ಮನ ನಿನ್ನಲ್ಲಿ ನಿಲುವಂತೆ ಮಾಡಿ                                        || ಪ ||

ಅನ್ನವನು ಬೇಡಿಕೊಂಬುವದೆಂತು ವಿಪುಳ ವಿಷ-
ವನ್ನು ಕುಡಿದಿಹ ನೀಲಕಂಠನೊಡನೆ
ಸನ್ನುತಾಂಬರವ ಬೇಡುವುದೆಂತು ಕರಿಚರ್ಮ-
ವನ್ನು ಪೊದೆದಿಹ ದಿಗಂಬರನೊಡನೆ ಶಂಭೋ                              || 1 ||


ಮಿರುಗುವಾಭರಣಗಳ ಬೇಡಿಕೊಂಬುದದೆಂತು
ಉರಗಕುಂಡಲ ಹಾರ ವಲಯನೊಡನೆ
ಪರಮಭಾಗ್ಯವ ಬೇಡಿಕೊಂಬೆ ನಾನೆಂತು ವಿಧಿ
ಶಿರದಿ ಭಿಕ್ಷವ ಬೇಡಿ ತಿರಿದುಂಡನೊಡನೆ                                         || 2 ||

ಕರಿತುರಗ ಮುಖ್ಯವಾಹನವ ಬೇಡುವುದೆಂತು
ನಿರುತ ಬಸವನ ಮೇಲೆ ಚರಿಪನೊಡನೆ
ಕರುಣದಿಂದೆನಗೆ ಕೊಡಲೇನುಂಟೋ ಕೆಳದಿಪುರ-
ದೆರೆಯ ರಾಮೇಶ ಶ್ರೀಕರ ಪಾರ್ವತೀಶ                                          || 3 ||